و : نه‌ژاد عزیز سورمێ: 
(1) کەژاوەی بـێدەنـگ
دەستەکانم لە گیرفانی کون کونمدا ناوە ،
بە شەقامدا ڕادەبوورم
بینیمن
بە دزیەوە ،
لەو دیو مینای چایـخانە و مغـازان
سەیرم دەکەن..
پاشان بە پەلەپرووزێ دێنەدەرێ و دوام دەکەون..
بەئەنقەست وەستام جگەرەیەک دابگیرسێنم
ئاوڕم لە دواوە دایەوە
وەک کەسێ بە پشتی
خۆی لە با دەپارێزی..
نیگایـێکم بۆ کەژاوەی بێدەنگ هاوێت:
دز ، پاشا ، بـکوژ ، پەیامبەر و شاعیر
لە هەموو شوێنێکەوە باز دەدەن و
بەدوامەوەن ،
چاوەڕێی ئاماژەیـێکی منن..
بە سەرسڕمانەوە سه‌رم بادایه‌وە
ڕێگەم گرتەبەر ،
فیکەشم لێ دەدا
ئاوازی گۆرانییەکی باو
خۆم وانیشان دەدا
دەور لە فلیمێـکدا دەبینم
هەموو ئەوەی لەسەرمە بیکەم
تا کۆتاییە تاڵەکە ، هەمیشە بەرەوپێش بڕۆم.
(2) لە پەنجەرەیەکی کراوەوە
بەسەر شەقامێکی تاریکدا
لە کاتێکدا چاوم لە پەنجەرە بڕیوە
گوێم بۆ ژاوەژاوی داگیرکاران لە شەقامدا هەڵـخستبوو ،
پەیتوونه‌کانیان لە تاریکیدا لێ دەخوڕی..
کوڕوکاڵیان بەدواوە بوو دەفیان لێ ده‌دا
کۆیلەی دیلیش زنجیربەند..
مۆتەکە پەنا بۆ من دێنن
لە دەرگای ماڵەکەم دەدەن:
جەللاد و قوربانییەکەی
پاشاو گاڵـتەجار و
نهێنیپارێزی…
جەللاد دێ دەستی بەخوێنی
لەبەر لوولەی ئاوی مندا بشوا
قوربانیی دێ
پیاڵەیێک فرمێسکی سوێری
پێشکەش دەکا..
پاشا دێ عەرشی خۆی
لە باخچەی مندا هەڵدەدا
گاڵـتەجاڕ دێ یارییەکانیم پێشان دەدا
نهێنیپارێز نهێنی خۆیم بۆ دەدرکێنێ..
دوا مۆمم پێ دەکەم
شەو لەبەر پەنجەرە دەوەستم
زۆرن ئەوانەی پێش بەیانیدان
لە دەرگام دەدەن.
• له كۆشیعری (صاعدا حتی الینبوع) شاعیر- بڵاوكردنه‌وه‌ی ده‌زگای (المدی)
چاپی دووه‌م 2003 وه كراون به كوردی.
