ئیبراهیم حسین: 
بارزانی لەم دوو هەفتەی ڕابردوودا و لە کۆنگرەی یەکگرتنەوەی هەردوو یەکێتی قوتابیان و لاوانی دیموکرات وەک هەر دیکتاتۆریەتێکی تری بۆرژوایی خۆسەپێن لە دنیای ئەمڕۆدا لە بەرامبەر کێشەی دەیان و سەدان هەزار کەس لە کارمەند و کارکردوانی کوردستان کە مووچە و حەقی کارەکانیان دەستی بەسەرداگیراوە لە قەولی میللەتەوە ڕایگەیاند، کە شەڕ و قوربانیەکانی خەڵکی کرێکار و زەحمەتکێش بۆ نان و موچە نەبووە.
ئەوەی کە گومانی تێدا نیە و خودی بارزانیش دانیپێدادەنێ و ڕاستیەکی بێپێچ و پەنایە ئەوەیە کە جوڵانەوەی کوردایەتی و خەباتێک کە لەژێر ئاڵای میللیگەرایی کوردایەتیدا کراوە لەپێناو ژیان و گوزەرانێکی شایستەدا و لەپێناو دامەزراندنی کوردستانێکدا نەبووە کە تێیدا مافی ژیانێکی شایستە بۆ هەموان، پەروەردە و خوێندن و دکتۆر و دەرمان و ئاسایشێکی کۆمەڵایەتی شایستە بۆ هەموان، یاسای ژیانی سیاسی و هەڵسوڕانی ئابوری و بەرهەمهێنان بێت.
دەبێ ئەوە لە بارزانی قبوڵ بکەین و وەک ئەو دانی پێدابنێین کە ئامانجی بزوتنەوەی سیاسی کوردایەتی و خەباتی ئەو هیچ یەک لەمانە نەبووە و هەر بۆیەش هیچ یەک لەو ئاوات و ئامانجانەی سەرەوە هیچ جێگەیەکیان لە کارنامە و بەرنامەی سیاسی و کۆمەڵایەتی کوردایەتیدا نەبووە. بگرە راستەوخۆ و هەر لەسەرەتاوە ئەم جوڵانەوەیە بەناچاری وەک بزوتنەوە و دەسەڵاتێکی بۆرژوایی و سەروخەڵکی کەوتە ئینکارکردن و سەرکوتکردنی هەر دەنگێک کە لەودیو دیوارەکانی کوردایەتیەوە، لەودیو مەقنەعەی ئایدیۆلۆژیای پووچی نەتەوەپەرەستیەوە بوو، کوردایەتیەك كە خۆی هیچ نیە جگە لە خورافاتی چینە دەسەڵاتدارەکان بۆ ئینکارکردنی دابەشبوونی چینایەتی و خەباتی چینایەتی و ئینکارکردنی جەوهەری هاوبەشی مرۆڤایەتی هاوڵاتیان. بۆیە ناسیونالیزم و نەتەوەپەرەستی کوردایەتی وەک عەرەبچێتی و فارسیگەری و تورکچێتی و تاد… ئەفیون و زەهری سڕکەری هۆش و ئیرادەی مرۆڤایەتی کرێکار و زەحمەتکێشن لەو جوغرافیا دیاریکراوانەی ناوی وڵاتەکانیان لێنراوە و لە چوارچێوەیاندا، لەژێر هەر ناو و پیرۆزیەکدا بێت، هەمان جۆری چەوسانەوە، کە چەوسانەوەی کاری کرێگرتەیە، بنەمای ئەو بێبەشکردنەی مرۆڤایەتی کرێکار و زەحمەتکێشە لە ئازادی و ژیانێکی یەکسان.
بەڵێ ئەوە ڕاستە بارزانی و ئەو چینەی کە نوێنەرایەتی دەکا و دەسەڵاتەکەیان کێشەی مووچەیان نیە، چونکە ئەوان لەسەر کرێ و فرۆشتنی هێزی کار ناژین، بەڵکو وەک هەر جێگەیەکی تری ئەم دنیایە بارزانی و ئەو کەمایەتیەی نوێنەرایەتیان دەکا، لەسەر چەوسانەوەی هێزی کار و چنینەوەی بەری رەنجی خەڵکی کرێکارو زەحمەتکێش دەژین، بۆیە کێشەی ئەوان نەک مووچە، بەڵکو لەگەڵ ئەو بەشەی کۆمەڵگادایە کە بەهۆی ئەوەی لە هەر جۆرە موڵکایەتیەک بێبەشکراون، ناچارن هێز و توانستی کاری خۆیان بەوان؛ بە خاوەنی سەرمایە و کۆمپاکانیان و دەوڵەت بفرۆشن تا زێدەبایی و سود و خزمەتگوزاریەکان بەرهەم بهێنن.
کوردایەتی و خورافەی کەرامەتی نەتەوەچێتی بەومانایە لە کێشمەکێشی ئێستادا ئاڵای ئایدیۆلۆژی و سیاسی بورژوازی کوردە لە چنگەکڕێ و شەڕ و ئاشتی نەبڕاوەیدا لەگەڵ بەشەکانی تری بۆرژوازی عێراقی و غەیرە عێراقی لەسەر بەشی زۆرتر و کەمتر لە کۆی سود و سەرمایەک کە لە جوغرافیای عێراق و کوردستاندا لەبەردەستە.
لەونێوەدا ئەوەی کە جێی هەڵوەستەلەسەرکردنە ئەوەیە؛ بارزانی بە نوێنەرایەتی بۆرژوازی کوردایەتی ئەو بەشەی سەهمی چینی کرێکار و زەحمەتکێشیان و کارکردوانی کۆمەڵگە لەسەروەتی وڵات کە ناوی کرێ و موچەیە و تاقە سەرچاوەی ژیان و گوزەرانی ئەوانە، دەکاتە شاباش و ڕایکێشاوەتە ناو شەڕ و دەعوای گڵاو چاوچنۆکانەی نێوان خۆیان لەگەڵ بەشەکەی تری بۆرژوازیدا، نەک ئەو بەشەی سەروەت و سامانی وڵات کە لەلایەن ئەوانەوە وەک سەرمایەیەکی گەورەی چەندین ملیاری دەستی بەسەرداگیراوە.
بارزانی لەکاتێکدا بەشی کرێکار و زەحمەتکێش لە مووچە دەرماڵە و ئەو لانیکەمانەی ژیانی چینی کرێکار و جەماوەری کارکردوانی کۆمەڵگە لە فەرمانبەر و مامۆستا و پەرەستار و تا دوایی وا بەشێوە سەخاوەتمەندانە بە ناوی کەرامەتی نەتەوەییەوە و لەسەروی ئیرادەی ئەوانەوە و بە ناوی ئەوانەوە شاباش دەکا، بەڵام لەولاوە ئامادە نیە تەنانەت دینارێك لە سەرمایەی چەندین ملیاردی خۆی و هاوچینەکانی لە خاوەن کۆمپانیاکان و سەروەرانی بازاڕ کە ئازادانە کەوتونەتە هەڵلوشینی موقەدراتی کرێکاران و جەماوەری زەحمەتکێش بکاتە قوربانی. لەکاتێکدا ئازادیەکی ڕەهای بۆ سەروەرانی بازاڕ و پارە و سەرمایە لە کوردستان فەراهەمکردوە و تەنانەت ئامادەیە هەموو بەش و سەکتەرەکانی ژیان لە خوێندن و پەرەوەردەوە تادەگات بە دکتۆر و دەرمان و کارەباشیان لەسەر تاپۆ بکات، بەڵام لە هەمان ئەو هەولێرەدا ئازادی قەدەغە کردوە، ڕۆژنامەنوس بە تاوانی قسەکردن و ڕادەربڕین زیندانیکردوە. مامۆستایەک کە لەسەر موچەکەی هاتۆتە سەرجادە، دراوەتە بەرشەق و بەکورتی دیکتاتۆریەتێکی لە ترس لەو ناوچەیە داسەپاندوە.
نا نەخێر سەردەمی ئەم کڵاولەسەرکردنە چینایەتیە بەناوی خوڕافەی نەتەوەپەرەستیەوە بەسەرچووە. کوردستان وەک هەر جێگەیەکی تر مەیدانی خەبات و ململانێیەکی سەخت و بێئامانی چینایەتیە لەسەر هەموو شتێک؛ لە نان و گوزەرانەوە بگرە تا دەگات بە حورمەتی مرۆڤ، لە مەدەنیەت و ئازادیە مەدەنیەکانەوە بیگرە تا دەگات بە چارەنوسی سیاسی و ئابوری و جۆری کۆمەڵگە و ئەوەی کە چی پیرۆزە و چی پیرۆز نیە، لە بەها ئەخلاقی و فەرهەنگیەکانەوە بیگرە تا دەگات بە یاسا و ڕێساکانی ژیانی مرۆڤ، لە دیکتاتۆریەت و سەرکوت و بێادمافیەوە تا دەگات بە ئازادی و ئازادئەندێشی و کۆمەڵگەی ئازاد و خۆشبەخت.
لە کۆمەڵگەی دڵخوازی ئێوەدا مرۆڤ ئازاد نیە و خاوەنی موقەدەرراتی خۆی نیە، ئازادئەندێشی و هەڵبژاردنی ئازادانە تاوانە و بە زیندان و تیرۆر و داپڵوسین وەڵام دەدرێتەوە، لە کۆمەڵگەی ژێردەستی ئێوەدا گۆڕستانی ژنانی بێناونیشان هەیە کە ژمارەیان بە قەد قوربانیانی شەڕێکی گەورەیە. لە کۆمەڵگەی ژێر فەمانڕەوایی ئێوەدا مرۆڤەکان بۆ پەیداکردنی دەرفەتێکی شەرافەتمەندانەتر لە سوچێکی تری ئەم گۆی زەویەدا لە دەریاکان دەدەن و ڕەودەکەن. لە کۆمەڵگەی ژێردەسەڵاتی ئێوەدا کۆنەپەرەستی بێدادیەتی و ژیانی فەرهەنگی و مەعنەوی مرۆڤەکانی هاڕیوە. دەسەڵاتی ئێوە بێسەرکوت و دیکتاتۆریەت و کۆنەپەرەستی بە پێوە ڕاناوەستێ. ئەمە مانای ژیانە لە کۆمەڵگەی ژێر دەستی ئێوەدا و مانای کەڕامەت لای ئێوە دەکاتە قبوڵکردنی ئەم چارەنوسە و لەڕوانگەی ئازادیخوازی و ئینسانیەتەوە، لەڕوانگەی پێویستی هەر ئەندازەیەک ئاڵۆگۆڕ بەقازانجی چارەنوسێکی مرۆڤانەتر، کەرامەت و شەرافەت بۆ چینی کرێکار و ژن و لاوی کوردستانی ئەم سەردەمە، تەنیا یەک مانای هەیە: ئەویش قبونەڵکردن و ڕەتکردنەوەی ئەم چارەنوسەیە کە بارزانی لە زمانی هەموو بۆرژوازیەوە نزیکەی سێ دەهەیە کردویەتی بە بەشی کرێکار و زەحمەتکێشی کوردستان.
٢٤.٥.٢٠٢٥
