ئه‌ندامێكی تیمی كوردستانی عێراقی رێكخراوی سی پی تی ئه‌مریكی رایده‌گه‌یه‌نێت، له سه‌ره‌تای مانگی ئه‌یلوله‌وه سوپای توركیا ده‌ستی كردوه به هه‌ڵمه‌تێكی فراوانی بڕینه‌وه‌ی دارستانه‌كانی زاپ و ئاڤاشین له سنوری قه‌زای ئامێدی.
كامه‌ران عوسمان، ئه‌ندامی تیمی كوردستانی عێراقی رێكخراوی سی پی تی ئه‌مریكی، رۆژی یه‌كشه‌ممه(١٩\١٠\٢٠٢٥)، له راگه‌یه‌ندراوێكدا وتی، لە سەرەتای مانگی ئەیلولەوە، سوپای تورکیا هەڵمەتێکی فراوانی بڕینەوەی دارستان و پارچە پارچەکردنی دارەکانی کوردستانی لە ناوچەکانی زاپ و ئاڤاشین لە سنوری قەزای ئامێدی دەستپێکردوە.
هێمای بۆ ئه‌وه‌ش كردوه، دارەکان بە شۆفڵ و حەفارە دەردەهێندرێن و بە ئامێری بڕەڕی پێشکەوتو پارچە پارچە دەکرێن و تەواوی دارەکان بە تراکتۆری مەدەنی، دەگوازرێنەوە بۆ ناو تورکیا و بەشێکی بۆ سوتەمەنی سودی لێوەردەگیرێت. بەشە زۆرەکەشی بۆ دروستکردنی کورسی و قەنەفە و کەلوپەلی لە تەختە دروستکراوی ناو ماڵ لەلایەن کارگەکانی تورکیاوە بەکاردەبرێن و دواتر ئەم کەلوپەلانە دەنێردرێنەوە ناو بازاڕەکانی کوردستان و بە دانیشتووانی هەرێمی کوردستان دەفرۆشرێنەوە.
وتوشیه‌تی، پاراستنی سنور و ژینگە و دارستانەکانی کوردستان لە بەرنامە و پرۆگرامی چ حزبێکی کوردستانی دایە؟ لەبەر شەڕە پەڕۆی هەڵبژاردن و دروشمی ڕەنگاوڕەنگ، کام حزب ئاگای لە وێرانکردنی ژینگەی سەوزی کوردستانە؟
كامه‌ران عوسمان له‌گه‌ڵ راگه‌یه‌ندراوه‌كه‌یدا ڤیدیۆیه‌كیشی بڵاوكردۆته‌وه‌و له‌باره‌وه وتویه‌تی، ڤیدیۆكه، کاتی گواستنەوەی دارە تاڵانکراوەکانی ناوچەی زاپە بۆ ناو خاکی تورکیا.
