68
هاوپشتی:ئاژانسەکان
ژمارەی ئەو کۆچبەرانەی لە نزیک بۆدرومی تورکیا لە دەریای ئیجەدا خنکان، بۆ 17 کەس بەرزبووەوە.
میدیاکانی تورکیا دەڵێن “ئۆپەراسیۆنەکانی گەڕان و ڕزگارکردن بۆ ئەگەری ڕزگاربووان بەردەوامە”.
ڕایگەیاندووە “پیاوێکی ئەفغانی کە لەڕووداوەکە ڕزگاری بووە و توانیویەتی بگاتە کەنار دەریاکە، ڕووداوەکەی لە دەوروبەری کاتژمێر 1ی بەیانی بە کاتی ناوخۆی وڵاتەکەی ڕاگەیاندووە”.
ئەو هاووڵاتییە ئەفغانییە بە کارمەندانی فریاگوزاری ڕاگەیاندووە، 18 کەس لەناو بەلەمەکەدا بوون، بەڵام دوای ماوەیەکی کەم لەڕۆیشتنی بەلەمەکە نوقم بووە.
شاری گەشتیاریی بۆدروم لە چەندین دوورگەی یۆنانییەوە نزیکە، لەنێویاندا دوورگەی کۆس کە یەکێکە لە دەروازەکانی رۆیشتن بۆ نێو یەکێتیی ئەورووپا لە دەریای ئیجەوە.
مەودای نێوان دوورگەی کۆس و تورکیا کەمترە لە پێنج کیلۆمەتر.
ژمارەیەک لەو بەلەمانەی کۆچبەران دەگوازنەوە، لەم گەشتە مەترسیدارانەی بەرەو دوورگەکانی یۆنان، نوقم دەبن.
بەگوێرەی رێکخراوی نێودەوڵەتیی کۆچ، لە ساڵی 2025، هەزار و 400 کۆچبەر لە دەریای نێوەڕاست گیانیان لەدەستداوە.
تورکیا، کە لە ساڵی 2016 بۆ وەستاندنی کۆچی نایاسایی بەرەو یەکێتیی ئەورووپا رێککەوتنێکی لەگەڵ برۆکسل واژۆ کرد، بەپێی ئاماری دامودەزگەکان، میوانداریی زیاتر لە 2.5 ملیۆن پەنابەر دەکات، کە زۆربەی هەرە زۆریان سووریایین.
