بنار مستەفا: 
ژیان و گوزەرانی خەڵکی لە کوردستان گەشتۆتە ئاستێکی سامناک و بەردەوامیش دژوارتر دەبێت. هەژاری و نەداری بەشێوەیەک تەنگی بە کۆمەڵگا هەڵچنیوە، کە کەمجار لە مێژووی کۆمەڵگادا دۆخی لەم چەشنە بینراوە.
گرتە ڤیدیۆکان و دیمەنە ناخهەژێنەکان تۆڕە کۆمەڵایەتییەکانیان تەنیوە، لەوانەی کەسانێکی زەحمەتکێش بۆ پەیداکردنی نانی ڕۆژانە، پەنادەبەنە بەر کار و ڕێگای یەکجار سەخت و ئاڵۆز. بۆ هەندێکیان تەنانەت گەرەنتی پەیداکردنی بچووکترین دەستکەوتی نییە. لە کاری تاقەتپڕوکێنەوە، تا دەستفرۆشی کۆمەڵە کاڵایەکی بچووک، کە ڕەنگە بەهای کۆی سەرجەمیان نەتوانن نانی ڕۆژێک دابین بکات؛ لە کۆکردنەوەی کارتۆن و پاشماوەی تری سەر شەقامەکان، بە ئومێدی هێزی گۆڕینەوەی لەگەڵ بڕە پارەیەکی بچووکدا؛ تا ئەو لەشكرە بێکارەی ئامادەی ئەنجامدانی هەر کارێکن بە کەمترین پارە، بەڵام بە کەمی پێیدەگەن.
هەموو ئەمانەی دەبینرێن لەگەڵ ئەو زۆرینە بێشومارەی نابینرێن، ڕووبەڕوو جەنگێکی سەخت و دژوارن لەگەڵ زیندوومانەوە. نەبوونی داهات و کەڵەکەبووی قەرزی لەبەیننەهاتوو؛ دەست نەگەشتن بە سەرەتایترین پێداویستییەکانی ژیان؛ چارەسەرنەکردنی نەخۆشییەکان؛ نەدیتنەوەی ڕێگای پاراستن لە سەرما؛ شەرم لە بەردەم وەڵامنەدانەوە بە خواستی منداڵانیان؛ و لەهەمانکاتدا دیارنەبوونی ئاسۆیەک بۆ دەربازبوون لەم دۆخە…
بێمووچەیی، زیادبوونی هەژاری، گرانی بازاڕ لە لایەک و لە لایەکی تریش بێباکی دەسەڵات و بەردەوامبوونی لە تاڵانبردنی سەروەت و سامانی کۆمەڵگا، هەموو ئەمانە دەست لەناو دەست ژیانێکی بێئەندازە سەختیان بەسەر جەماوەری کرێکار و زەحمەتکێشدا سەپاندووە، کە نەک دوورە لەوەی بتوانن بیر لە خۆشییەکانی ژیان بکەنەوە، بەڵكو تەنها جەنگی پەیداکردنی نانی ڕۆژ بۆتە ئامانجی سەرەتا و کۆتایی. ژیانێک تێیکەوتوون، نەک هیچ کەس خۆزگەی پێناخوازێت، بەڵکو تەنها بیرکردنەوە لێی مرۆڤ تووشی ڕاچڵەکین دەکات.
هەڵبەت هەمووان لە کوردستان برسی و بێکار یان بێمووچە نین. هەر لە شارەکان و کەمێک ئەولای شوێنی ژیانی خەڵکی، جیهانی تایبەتی کەسانی تر هەیە، کە یان بەشێکن لە دەسەڵات و دارودەستەکەی، یان نزیکن لێیان. کۆشک و باڵەخانەی بەرزی ئەمانە، بەردەوام بەرزتر بەڕووی ئاسماندا دەچن و ڕێژەیان زیاد دەکات؛ کاروانی ئۆتۆمبێلەکانیان شەقامەکان بەسەر خەڵکیدا دادەخەن؛ کەناڵی نوێێ ڕاگەیاندن بە نوێترین و گرانبەهاترین ئامێر و تەکنەلۆجیا و ستافی سەدان کەسی دەچەرخێنن و دەزگای دیکەی نوێ دادەمەزرێنن؛ ملیۆنان دۆلار بۆ بانگەشەی هەڵبژاردن تەرخاندەکەن، تا بەڵێنەکانیان بە جەماوەری خەڵکی بگات، کە “نوێنەرایەتی بەهێزیان دەکەن”؛ بەردەوام کۆمپانیای نوێ سەرهەڵدەدات و ژمارەی ملیۆنەر و ملیۆنەرەکان گەشە زیاددەکەن؛ هێزی سەربازی و دەزگا و یەکەی جۆراوجۆر، بەردەوام لە گەشەدایە… ئەم ئەلیتە کەمە، نە لەگەڵ هیچ دژوارییەک بەرەوڕووە، نە کەڵەکەی سامانیان زیانی پێدەگات، نە گلەییەکیشیان لە دۆخەکە هەیە… ئەگەر ئەو گلەییە هەژمارە نەکەین، کە پێیانوایە جەماوەری خەڵکی بەپێی پێویست درک بە گەورەیی و عەزەمەتی دەسەڵاتداران ناکەن و خۆیان بە قەرزارباریان نابینن.
واتە لە بەردەستی دەسەڵات و دارودەستەکەیدا پارە هەیە، بەڵام ئەوەی لێێ بێبەشە خەڵکی کرێکارو زەحمەتکێشی کوردستانە. دەزگا ڕاگەیاندنە زەبەلاحەکان و بانگەشەی هەڵبژاردن و کەڵەکەی سەرمایە و سەقامگیرکردنی کۆمپانیاکانیان و پەرەدان بە هێزە سەربازییەکانیان بۆیان ئەهمیەتی زیاتری هەیە تا ئاوڕدانەوەیەک لە ژیانی خەڵكی زەحمەتکێش و دابینکردنی مووچەو خزمەتگوزاریە کۆمەلایەتیەکان . کۆشک و تەلاری نوێی و بازرگانی و کێبڕکێی دەسەلاتی زیاتر جێگەی بایەخی دەسەڵاتدارانە، نەک وەڵامدانەوە بە پەیداکردنی پاروە نانی هەژاران.
ئەم دەسەڵاتە بەکردەوە نیشانیداوە کە ژیان و گوزەرانی خەڵکی هیچ ئەرزشێکی نییە لای. ئاگاداری نەبوونی و سەختی ململانێێ خەڵکییە بۆ پەیداکردنی پاروەنانی ڕۆژانە، بەڵام نەک کاریگەری تێناکات، بەڵکو بە هاندان و ستایشکردن، بانگەوازیان دەکات بە بەشی خۆیان ڕازی بن و تەنانەت سوپاسگوزاری دەسەڵات بن.
هەژاری و کارەساتی جەنگی زیندوومانەوە، هەرئێستا دنیایەک ئاکامی نەخوازراو و دڵتەزێنی بەدوای خۆیدا هێناوە: لە بێبەشبوونی خەڵکی لە ژیانێکی سادە و خۆشگوزەرانی؛ زیانی گەورەی منداڵان لە خوێندن و پەروەردە؛ زیادبوونی تاوان و نائارامی لە ژیانی ڕۆژانەی خەڵكیدا؛ بێئومێدی و نەدیتنی هیچ هیوایەک بۆ ئایندە… هەموو ئەمانە ئاماژەن بە دواڕۆژێکی مەترسیدار بۆ کۆمەڵگای کوردستان. گەر لە جیهاندا خەڵکی لەپێناو ژیانێکی باشتر خەبات دەکەن، لە کوردستان خەڵکی لەپێناو بەدەستهێنانی سەرەتاییترین پێداویستییەکانی ژیان و بگرە وەرگرتنی مووچەکانیان دەجەنگێن، لە بەرانبەریشدا دەسەڵات لەهەموو ئیمکاناتێکی دارایی بەهرەمەندە و تەخشانوپەخشان بە داهاتی کوردستانەوە دەکات.
خەڵكی کوردستان تا کەی لە جەنگی زیندوومانەوەدا بێت؟ ڕۆشنە دەسەڵات خۆبەخشانە مل نادات و ئامادەی سازش نییە. جەماوەری کرێکار و زەحمەتکێش تەنها بە خەبات و یەکگرتوویی و ڕێکخراوبوونی خۆیان دەتوانن گۆڕانکاری لە بەرژەوەندی خۆیان بەدیبهێنن. چاوەڕوانی لە دەسەڵات کوشندەیە و بێئومێدی کوشندەتر. خەباتی یەکگرتووانە و هوشیارانە لە دەوری خواست و ئامانجی ڕۆشن و لەژێر ڕابەرایەتیەکی سیاسی شۆڕشگێڕو کۆمۆنیستیدا، کلیلی ئاڵوگۆڕە!
٢٢ی نۆڤەمبەری ٢٠٢٥
