موحسین کەریم: 
بەپێچەوانەی ئەو بۆچوونەی بەشێك لە چەپی ئەوروپی کە پێیوابوو ئەوەی لە ئۆکرانیا دەگوزەرێ شەڕی ڕوسیایە دژ بە خەڵکی ئۆکرانیا، بۆیە ئەو شەڕە لەلایەن ئۆکرانیاوە شەڕی بەرگریەو ڕەوایەو شایستەی پشتیوانیە، کە لەڕاستیدا ئەم لێکدانەوەیە دەنگدانەوەی سەدای هەر ئەو پڕوپاگەندە سیاسیەی ئەمریکاو ناتۆ بوو کە سەبارەت بە شەڕەکە بڵاویان دەکردەوە، ئێمە کۆمۆنیستە پێمانوابوو کە ئەوەی ڕودەدات شەڕی نێوان ڕوسیا و ناتۆیە و لەسەر خاکی ئۆکرانیا بەڕێوەدەچێت. هاوکاری بێدرێغی ئەمریکاو دەوڵەتانی ئەوروپا، بەتایبەتی بەریتانیا و فەرەنساو ئەڵمانیا لەڕووی چەکی پێشکەوتوو، هاوکاری زانیاری و هەواڵگری، هاوکاری دارایی، هاوکاری لۆجستیکی و مەشقی سەربازی و بگرە ئامادەبوونی شارەزایانی سەربازی و هەواڵگری ئەمریکی و ئەوروپی لەئۆکرانیا و پشتیوانی دەوڵەتانی ناتۆی درواسێی ئۆکرانیا، هەموو ئەوانە کە بەشێوەی ئاشکرا ئەنجام دەدرا، ئەم ڕاستیەی بۆ هەر مرۆڤێك پشتڕاستکردەوە کە کەمێك سەلیقەی سیاسی هەبێت.
بەپێی ئەو بەڵگانەی کە دواتر ئاشکرا کران، دوای روخانی یەکێتی سۆڤیەت، روسیاو ناتۆ لەسەر ئەوە رێکەوتن کە کۆتایی بە بارگرژیەکان بهێنن و کێبرکێی میلیتاریستی نێوانیان ڕابگرن، لەبەرامبەردا ناتۆ ” یەك ئینج بەرەو رۆژهەڵات نەکشێت”، بەڵام ئەوەی ڕوویدا، نەك هەر ناتۆ بەرەو رۆژهەڵات کشا، بەڵکو گەیشتە سەر سنورەکانی ڕوسیا. ئەمەش لەلایەن روسیاوە کە تازە خەریك بوو لە مۆتەکەی کاریگەریەکانی دوای روخانی سۆڤیەت رزگاری دەبوو، وە وەکو زلهێزو جەمسەرێکی ئیمپریالیستی خۆی سازدەدایەوە، قبوڵ نەکراو سەرەنجام لەساڵی ٢٠١٤ دا بەرامبەر هەوڵەکانی ناتۆ بۆ پەیوەستکردنی ئۆکرانیا، هێرشی کردە سەر دۆرگەی “قەرم- کرێما” و داگیریکرد. ئەوکات ناتۆ، رێکەوتنامەیەکیان لەگەڵ روسیادا واژۆکرد کە ئۆکرانیا بەهیچ جۆرێک ناتوانێ ببێت بە ئەندامی ناتۆ، بەڵام وەکو لە دەربڕینەکانی مێرکڵ، ڕاوێژکاری پێشووی ئەڵمایاندا ئاشکرا کرا، ئەو رێکەوتنە بۆئەوە بووە کە سوپای ئۆکرانیا بەهێزبکرێت بەرامبەر بە روسیا و رێکەوتنە بۆ کڕینی کات بووە بۆ ئۆکرانیا و ناتۆ!
ڕوسیا بەرامبەر بەم پیلانەی ناتۆ، هێرشی سەربازی بۆسەر ئۆکرانیا لە ساڵی ٢٠٢٢دا دەستپێکرد. هۆکاری هێرشەکەشی بەوە پاکانەکرد کە بۆ پشتیوانی لە هاولاتیانی چەند هەرێمی رۆژهەڵاتی ئۆکرانیایە کە زۆرینەی دانیشتوانەکەی ڕوسن و لە ریفراندۆمێکدا پەیوەستبوونی خۆیان بەڕوسیاوە ڕاگەیاندبوو، بەڵام کەوتبوونە بەر پەلاماری سوپای ئۆکرانیا! بێگومان ئەم پاساوە، جەوهەری ڕاستەقینەی هێرشەکەی روسیا بەیان ناکات، بەڵکو
بۆ ڕوسیا ئەندامبوونی ئۆکرانیا لە هاوپەیمانی ناتۆدا وەکو مەترسیەکی وجودی لەسەر ڕوسیاو پێگەی جیهانی خۆی وەکو ووڵاتێکی سەرمایەداری و جەمسەرێکی جیهانی لێكدەدرێتەوە. بۆیە لەڕاستیدا شەڕەکەی ڕوسیا و ئۆکرانیا، کە لەسەر خاكی ئۆکرانیا بەڕێوە دەچێت و سەربازی ئۆکرانی دەکوژرێن، شارو ماڵو حاڵی خەڵکی ئۆکرانیا وێران دەبێت، ملیۆنەها هاوڵاتی ئۆکرانیا ئاوارەی ووڵاتانی ئەوروپی کردوە، شەڕی ناتۆیە لەگەڵ ڕوسیا، کە لەبەری روسیاشەوە دەیان هەزار سەرباز لە کرێکاران و خەڵکی کەمدەرامەت کراونەتە قوربانی سیاسەتی ئیمپریالیستی سەرمایەداری ڕوسیا بەناوی پاراستنی روسیا لە مەترسی تیاچوون و بەرگریکردن لە نیشتمان و شکۆی ڕوسیا!
ئەمریکاو ناتۆ لە شەڕەکەیاندا لەگەڵ ڕوسیادا شکستیان هێنا. نەیانتوانی سەربازی گەمارۆی ئابوری توند و پاڵپشتی و هاوکاریە سەربازیە سەخاوەتەمەندانەکانیان بۆ ئۆکرانیا، ئابوری ڕوسیا نابوت بکەن و هێزی سەربازی روسیا لە پێشڕەوی بۆناو ئۆکرانیا ڕابگرن. تەنیا یەك رێگەیان هەبوو بۆ شکستپێهێنانی ڕوسیا، ئەویش بەشداری راستەوخۆی سوپای ناتۆ بوو لەشەڕەکەدا، کە ئەوەش لەگەڵ ووڵاتێکی خاوەن هەزاران چەکی ئەتوۆمیدا لەناوبردنی خۆشیان بوو، نەك تەنها روسیا. دەستەی فەرمانڕەوای ئەمریکا ئێستا لەو ڕاستیە تێگەیشتوە و پێشنیارەکانی ترامپ بۆ ئاشتی داننانە بەو واقعیەتەدا. کۆبونەوەی ئالاسکای نێوان ترامپ و پۆتین و دواتریش پێشنیارە ٢٨ی خاڵیەکەی ترامپ بۆ زیلینسکی سەرۆکی ئۆکرانیا کە بەپێی ئەوەی دزەی کردوە بۆ میدیاکان، زۆربەی مەرجەکانی ڕوسیای دەستبەرکردوە، تەنانەت بەشێك لە سیاسەتمەدارانی رۆژاوایی بەپێشنیاری خۆبەدەستەوەدانی ئۆکرانیای ناودەبەن، ئەوە نیشان دەدات کە:
ئەمریکا هێزی سەرەکی و بڕیاردەری ناو ناتۆیە و ئەوروپا هەمیشە وەکو برابچووک و قەڵغانی پێشەوەی پاراستنی بەرژەوەندیەکانی ئەمریکا بووە بەرامبەر بە سۆڤیەت لە پێشوودا و دواتریش بەرامبەر بەروسیا، ئێستا ئیتر بەرژەوەندی لەوەدا نیە درێژە بەو شەڕەبدات لەگەڵ ڕوسیادا. بەکردەوە بۆی دەرکەوت کە لەباری سەربازیەوە ناتوانن ڕوسیا بشکێنن. ڕوسیاش ئەو ئیدیعایەی نیە کە چ لەباری سەربازیەوە ئەمریکا شکست پێدەدات و چ لەباری ئابوریشەوە دەتوانی ڕکابەرێکی گەورەی ئەمریکا بێت، بۆیە ڕوسیا ئەوەندەی دەوێ کە وەکو جەمسەرێکی جیهانی سەرمایەداری لەلایەن ئەمریکاوە بەتایبەتی و ئەوروپاوە قبوڵ بکرێ. کێشەی سەرەکی ئەمریکا لەگەڵ چیندایە کە وەکو دێوێکی ئابوری گەمارۆی ئابوری جیهانی داوە و هەڕەشە لەباڵادەستی و هەژمونی ئابوری ئەمریکا دەکات لەئاستی دنیادا. ئەمریکا دەبێت خۆی بۆ بەرەنگاربوونەوەی چین ئامادەبکات. مەیدانەکانی ڕوبەرووبونەوەی لەگەڵ چیندا لە تایوانەوە دەستپێدەکات، تا ڕۆژهەلاتی ناوەڕاست، ئەفریقا، ئەمریکای لاتین و بگرە ناوخۆی ئەوروپا و ئەمریکاش! ستراتیژی نوێی ئەمریکا وەکو جەمسەرێکی ئابوری- سەربازی پێشگرتنە بە پێشرەویکردنی چین و جێلێژکردن بە ئەمریکا. ئەوروپاش سەرەنجام دەبێ هەروەکو ئۆکرانیا، لەریزی دواوە دابنیشن و چاوەرێی رێکەوتنی نیوان ترامپ و پۆتین بن! ئەوان شەڕکەرە راستەقینەکان نین!
