کۆژین بەهادین مەحموود: 
چەند مانگێک لەمەوبەر و لەوکاتەی تازە بە تازە بەغدا موچەی ناردبوو، بەبێ ئەوەی هەرێم پابەندییەکانی خۆی جێبەجێ بکات، مەسعود بارزانیی سەرۆکی پارتی، دوای چەند ساڵێک لە سڕکردنی هاتەوە سەر شاشە، لەبری ئەوەی بە چەند دێڕێک دۆخی چەقبەستووی هەرێم و بەغدا بشکێنێت و هەوڵی زیاتر لێکنزیکبوونەوە بدات، وەک پیشەی هەمیشەیی خۆی دەستی کرد بە هەڕەشە و گوڕەشە لە بەغدا و دەیوت چیتر قبوڵی ناکەین بەغدا ناردنی موچە دوابخات!
هەر دوای زیاتر لە مانگێک لەم هەڕەشانەی سەرۆکەکەی پارتی، جەژنی قوربان هات و بەغداش یەک دیناری موچەی نەنارد وەک تەحەدا و وەڵامێک بۆ قسەکانی بارزانی! خەڵکیش بەبێ موچە و بەبێ پارە جەژنیان بەڕێ کرد، تەنانەت چەندین ماڵ و خێزان لەبەر نەبوونی نەیانتوانی هێلکە و رۆنێکیش بۆ نانی جەژن ئامادە بکەن، کەچی جەنابی سەرەڕای ئەو هەموو هەڕەشەیەش نقەی نەهات بەرامبەر بەغدا، دەڵێن لە دڵی خۆیدا دوعای لە حکومەتەکەی سودانی کردووە!!
لەم چەند رۆژەی رابردووش جارێکی دیکە سەرۆکە کارتۆنییەکەی پارتی،( لە ئێستادا مەسروری کوڕی تەواوی دەسەڵاتی حزبەکەی لایە) هاتەوە سەر شاشە و دەستی کردەوە بە پەنجە راوەشاندن و هەڕەشەکردن، ئەمجارە لە بەغدا نا، چونکە بۆی دەرکەوتووە هەڕەشەکانی لە بەغدا وەک هینی بن گۆم وان و کەس حسابیان بۆ ناکات، بەڵکوو هەڕەشەکانی ئاڕاستەی یەکێتی بوو، شەریکە ٣٠ ساڵییەکەی! دەیوت ئەگەر نایەن حکومەت پێکبهێنن بەدیلتان هەیە و لێتانی قبوڵ ناکەین چی دیکە پێکهێنانی حکومەتێک کە بە دڵی ئێمەیە و هەموو دەسەڵاتێک لای خۆمانە دوابخەن!
ئاخر جەنابی مەسقوت بارزانی! ئێوە لەگەڵ شەریکەکەتان ٣٤ دانە ساڵە ئەم میللەتە ئەچەوسێننەوە، چەندین ساڵە سوکایەتی نەماوە بە پیرۆزی و موقەدەساتی ئەم میللەتەی نەکەن، سەر ئەرز و بن ئەرزی ئەم وڵاتەتان تاڵان کرد، هێزی بێگانەتان هێناوەتە ناو ئەم هەرێمەوە کە بە خوێنی هەزاران منداڵ و گەنج و پیر دروستبووە، نیوەی خاکەکەیتان بە چەقەنەیک فرۆشت! تێرتان نەخواردووە ئێستا بەتەمان دیسان شەڕێکی دیکەی ناوخۆ هەڵبگیرسێننەوە و هەزاران گەنجی دیکە هاوشێوەی شەڕی ناوخۆی نەوەدەکان بە کوشت بدەن و ئەم هەرێمە ٣ پارێزگاییەش بە یەکجاری هەڵوەشێننەوە؟ تەنها لەبەر خاتری گیرفان و دەسەڵاتەکەی خۆتان؟ نا کاکە ، ئاڕاستەى هەڕەشەکردن لە بەغدای دراوسێت بێت، هەڕەشە لەوان بکە کە وا دەگەینە زستان و خەڵک هێشتا یەکەم موچەی پایزی وەرنەگرتووە!
ئەگەریش ناتوانیت و ناوێریت، بێدەنگ بە و بچۆرەوە ناو قاوغەکەی خۆت! ئەو قاوغەی لە ٢٠١٧’ەوە و دوای ریفراندۆمە نەزۆکەکەت بۆیان دروست کردی!
