29
کامەران عوسمان:
کامەران عوسمان:لە ساڵی ٢٠٢٠، گەنجێکی خەڵکی بەرواری باڵای سەر بە ناحیەی کانێ ماسێ کە نیشتەجێی ووڵاتی هۆڵندایە، بەدڵ و بەگیان هاتەوە بۆ هەرێمی کوردستان و بڕیاریدا، کارگەیەکی گەورە بکاتەوە و لە سێوی سەوز و سوری بەرواری باڵا شەربەت دروست بکات و لانی کەم بڕی پێویستی شەربەت بۆ دەڤەری بادینان بەرهەم بهێنێت کە چیتر خەڵکی ناوچەکە پشت بە بەرهەمی کارگەکانی تورکیا نەبەستن و بەرهەمی شەربەتی خۆماڵی وەدەست بخەن. بناغەی کارگە لێدرا و ئامێری پێویست لە دەرەوە داواکرا. هێشتا دیوارەکانی کارگەکە بەتەواوی نەکەوتبوونە سەر پێ، فڕۆکە جەنگییەکانی تورکیا بە دوو موشەک بناغەی کارگەیان وێران کرد و خەونی دروستکردنی کارگەی شەربەتی خۆماڵی لەبارچوو!.
کاتێک، وەزیری پێشووی کشتوکاڵی حکومەتی هەرێم بڕیاریدا بە ڕاگرتنی هاوردەی هێلکەی ووڵاتی ئێران و تورکیا و پشت بەستن بە کێڵگە ناوخۆییەکانی هێلکە هەڵهێنان، هەم تورکیا و هەمیش ئێران هەڕەشەیان کرد و حکومەتیان ناچارکرد بە هەڵوەشاندنەوەی بڕیارەکە!.
ئێستاش کاتێک، کێڵگەی گازی کۆرمۆر دەبێتە بڕبڕەی پشتی ووزەی هەرێمی کوردستان و عێراق و بەرهەمی کێڵگەکە دەستی حکومەتی هەرێمی کوردستان واڵا دەکات بۆ دابینکردنی کارەبای “٢٤ کاتژمێری”، ئەوا کێڵگەکە بە ئامانج دەگیرێت و تاو نا تاوێک هەوڵی شکاندنی پشتی ئابووری و ژێرخانی ووزەی ئەم ناوچەیە دەدرێت!.
تۆ مافی بووژاندنەوە و پێشکەوتن و پشتبەخۆبەستنت پێ نادرێت و لە سێ لاوە چاوی بەدکارت لەسەرە، ئیدی دەتەوێت بە یەکتری تۆمەتبارکردن و گاڵتەکردن بە بێ کارەبایی خەڵک و بیانووهێنانەوە بۆ ئەم هێرشانە ژیانی خەڵک باشتربکەیت و ئاسایشی خەڵک بپارێزیت؟.
چوار دەوری تۆ، لەسەر بچوککردنەوە یاخود ڕێگریکردن بۆ پێشکەوتنی هەرێمەکەی تۆ کۆکن و هەردەم ئامادەن، ئەی تۆ بەم ناکۆکی و شەڕە پەڕۆ و بێ ڕوانگەییە بۆ داهاتووی نەتەوەکەت دەتەوێت چی بینا بکەیت؟.
هەرگیز بەئەندازەی ئێستا، کورد پێویستی بە یەکگرتوویی و ئیشی پێکەوەیی نەبووە. بەڵام گوتاری پۆپۆلیستی و خەڵک هەڵخەڵەتێنەر، بووە بە مۆرانەی پەتی پێکبەستی و دروستکردنی خەونی هاوبەشی نیشتیمانیانە.
