سڵاو جەنابی وەزیر
ئەمەوێ قسەت بۆ بکەم، گوێم لێ دەگریت ؟؟
جەنابی وەزیر بۆ کوێ ڕۆشتوویت ؟ دوور مەڕۆ ئێمە لێرەین ، ئێمەی پەنابەر لێرەین ؟
ئەگەر ئەتەوێ هۆکاری کۆچ بزانیت وەرە با ئێمە بۆت باس بکەین .
جەنابی وەزیر بۆ ئازارەکانی ناو دڵی ئێمە، لەناو ژورەکەی بارزانی مەگەڕێ ، یەک دانە ساڵی تر کون و قوژبنەکانی ژوورە ڕازاوەکەی سەرۆک وەزیران بگەڕێی هۆکارێک نادۆزیتەوە ، ئەوێ دوڵێکەو ، ژیانی گەنجانی کورد لە دۆڵێکی تردایە .
جەنابی وەزیر بە دەیان سەعاتیش دەستە نەرمونۆڵە خوێناوییە گەرمەکانی سەرۆک وەزیران بگوشیت هەست بە ساردوسڕی تەزیوی دەستی وڵاتەکەم ناکەیت .
جەنابی وەزیر
تۆ وەکو ئێمە ئەوان ناناسیت، دە هێندەی تریش پارەیان پێ بدەیت وەکو پارەی نەوتی هەرێم ئەیدزن و ڕێگریی لە کۆچیش ناکەن ، ئەوان ئەیانەوێ هەمووی کۆچکاو هەموو هەرێم بۆ خۆیان و نەوەو کۆیلەکانیان بمێنێتەوەو قۆرخی بکەن .
جەنابی وەزیر سەردانێکی زیندانە لاکۆڵانە نهێنی و ئاشکراکانی سەرۆک وەزیران بکە ئەوجا دەزانی خەڵکی بۆچی کۆچ دەکەن .
بڕۆ گوێ بگرە لەو گەنجانەی هەولێر کە ناوێرن بڵێن موچە دواکەوتووە ئەوجا دەزانیت بۆچی کۆچ دەکەن .
جەنابی وەزیر ئێمە لەوێ گوێمان لێ ناگرن ، ناهێڵن دەنگ هەڵبڕین لەوێ ، زمانمان دەبڕن دەمانکوژن بۆیە پەنامان بۆ ئێوە هێناوە ئەگەر ئێوەش دەرگامان بەڕوودا داخەن سەری خۆمان بۆ کوێ هەڵگرین ؟؟
ئایا لەم جیهانە فراوانەدا شوێنێک هەیە مرۆڤ تیایدا بە ئازادی بەشکۆوە بە کەرامەتەوە بژی؟!
عەزیز حەمە
ئەندامی بۆردی ڕێکخراوی داکۆک