تۆڕی هاوپەیمانی 19 گرژییەکانی خۆپیشاندانەکەی ئەمڕۆی ھاوڵاتیانی گوندی لاجان لە سنوری ھەولێر بە “روداوە خوێناوییەکە” ناودەبات و داوا لەدەزگا ئەمنییەكانی پارێزگای هەولێر دەكات لێكۆڵینەوەی جدی لەسەر كوژرانی كەسێكی سڤیل لە بەردەم كۆمپانیای لاناز بكات و مافی هاوڵاتیان لە رێكخستنی خۆپیشاندان و گردبونەوە بپارێزێت و رێگر نەبن لە روماڵی رۆژنامەنوسان.
ئاوێنە: تۆڕی ھاوپەیمانی 19، کەمێک لەمەوبەر لە راگەیەندراوێکفا وتی، دوا نیوەڕۆی ئەمرۆ رێكەوتی 29 ی تشرینی دووەمی 2025، لەكاتی خۆپیشاندانی بەشێك لە هاوڵاتیانی گوندی لاجانی سەر بە پارێزگای هەولێر، لەبەردەم كۆمپانیایەك كە داوای دامەزراندنیان دەكرد، شەڕو ئاڵۆزی روودەدات و لەئەنجامدا كەسێك دەكوژرێت و چەند كەسێكیتر بریندار دەبن.
وتوشیەتی، هەروەها رێگری لەبەشێك لە دەزگاكانی راگەیاندن دەكرێت روماڵی روداوەكە بكەن و كەل و پەلی رۆژنامەوانیش دەشكێندرێت.
شەیما ئەحمەد پەیامنێری كەناڵ 8 بە تۆری 19ی راگەیاندوە، لەكاتی روماڵی راستەوخۆدا بووم لەسەر روداوەكە لەلایەن چەند كەسێك بە بەرگی سەربازییەوە، هێرشكرایە سەرمان و پەخشەكەیان وەستاندین، هەروەها بەشێك لە كەلوپەلی رۆژنامەوانییەكەیشمانیان شكاند.
تۆڕی هاوپەیمانی 19 ئیدانەی كوژرانی خەڵكی سڤیلی کردوەو داوای لەدەزگا ئەمنییەكانی پارێزگای هەولێر کردوە لێكۆڵینەوەی جدی لەسەر كوژران و برینداربوونیان بكات.
حەختیشیکردۆتەوە، دەبێت مافی هاوڵاتیان لە ئەنجامدانی خۆپیشاندان و گردبونەوە پارێزراو بێت و رۆژنامەنوسانیش ئازادانە بیتوانن روماڵی روداوەكان بكەن.
