31
عەزیز ڕەئووف:
عەزیز ڕەئووف:هێشتا مەرەکەبی پەنجەی دەنگدەران کاڵنەبۆتەوە، کەوتنە وێزەی خەڵکی هەژار و گەنجی جوانی وڵاتەکەمان. هێشتا تای هەڵبژاردن دانەبەزیوە دەستیان چووە خوێنی لاوانی کورد. هێشتا پشکۆی ئاگرەکەی کۆرمۆر خامۆش نەبووە، میلیشیای کورد” شێری ناوەوە و ڕێوی دەرەوە” ئاگری چەکەکانیان ڕوو لە گیانی پڕ لە وزە و ئومێدی گەنجانی وڵاتەکەمان کرد.
لالەزاری پێش هەڵبژاردن و لاجانی دوای هەڵبژاردن، دروست کردەی میلیشیا و مافیاگەری دەسەڵاتی کوردی پیشانداین. دەسەڵاتێکی جووتحزبی کوردی کە ئەوەی لە هەڵمەتی هەڵبژاردنەکاندا بەیەکتریان دەوت هەردوکیان ڕاستیان دەکرد.
ئەوەی ئەسەفی گەورەیە ستەمکاری دەسەڵاتی کوردی نییە کە لەمێژە ڕوخساری راستەقینەی خۆیان نیشانداوە، ئەوەی نوکتەی گەورەیە ئەو هێزە بەناو ئۆپۆزسیۆن و هێزە ساختانەیە کە لە ئاست ڕووداوی وەک گوندی لاجاندا جگە لە قسە و ئیدانەکردن هیچیان لەدەست نایات.
کوشتارگەی لاجان لە دەڤەری هەولێر پێی وتین ئەم خوێنە وا زوو ناوەستێت و ئەم بێساحێبی شەقامەی کورد بەدیار ئەم هێزە ساختە و پاڵەوانگەلی سەرشاشەوە، بەردەوام دەبێت و ئەگەر سنورێک بۆ ئەم خوێنە دانەندرێت، ئەوا سەری زۆرێک دەخوات و دنیای ئێمە لێڵتر و ناشرینتر دەکات.
لە لالەزارەوە بۆ لاجان، هەمان ئەقڵ و هەمان چەک و هەمان خوێن و هەمان شەیتان.
