رۆژنامه‌ی شه‌رق ئه‌لئه‌وسه‌ت بڵاویكرده‌وه، لە میانی خۆپیشاندانێکی ناڕەزایی لە دەرەوەی پاڵاوگەی نەوتی لاناز لەسەر ڕێگای باکوری شاری هەولێر بەهۆی تەقەی هێزە ئەمنییەکانی هەرێمی کوردستان لانیکەم دو کەس کوژراون و سێ کەسی دیکەش برینداربون.
ئاوێنە: رۆژنامه‌كه له ڕاپۆرتێكدا باسی له گرژییه‌كان و خۆپیشاندانی خه‌ڵكی ناڕازی گوندی لاجانی سنوری گوێر كردوه و ده‌ڵێت، “خۆپیشاندەران داوای هەلی کاریان لە پاڵاوگەکەدا دەکرد، لە کاتی ناڕەزایەتییەکانیاندا، هێزە ئەمنییەکانی پاسەوانی پاڵاوگەکە تەقەیان لێکردون”.
به‌گوێره‌ی وته‌ی سه‌رچاوه‌كان ئاماژەی بەوەشکردوە، لە ئەنجامی تەقەکردنەکەدا خۆپیشاندەرێک گیانی لەدەستداوە، هاوکات شۆفێری بارهەڵگرێکی گواستنەوەی بەرهەمە نەوتییەکانیش لە کاتی نزیک پاڵاوگەکەدا گیانی لەدەستداوە.
وەزارەتی ناوخۆی حکومەتی هەرێمی کوردستان دره‌نگانی شه‌وی ڕابردو، ڕایگەیاند، لە ئەنجامی تەقەی کۆمەڵێک “ئاژاوەگێڕ” لە ناوچەی گوێر کەسێک کوژراوە و کەسانی دیکەش برینداربون.
ئه‌وه‌شی خسته‌ڕو، “ماوەیەکە لەلایەن چەند دەستێکی دەرەکی و بە فیتی هەندێک کەس و لایەنی ناوخۆیی، هەوڵی نانەوەی ئاژاوە دەدرێت، نوێترین هەوڵی تێکدەرانە بە بەئامانجگرتنی کێڵگەی غازی کۆرمۆر دەستیپێکرد کە مەبەست لێی راگرتنی بەرهەمهێنانی کارەبای هەرێم بوە”.
وه‌زاره‌تی ناوخۆ هۆشداریداوه و ده‌ڵێت، “چیتر رێگە نادەین سود لە نیازپاکیی دامو دەزگاکانی هەرێمی کوردستان وەربگیرێت و سنورێک بۆ ئەو کارە تێکدەرانە دادەنرێت، بۆ راگرتنی ئەو جۆرە ئاژاوەگێڕییانە، بە پێی یاسا بەرکارەکان لە هەرێمی کوردستان مامەڵە لەگەڵ کەسانی ئاژاوەگێڕ دەکرێت و کەس لە سەروی یاسا نییە”.
نیوەڕۆی دوێنێ شه‌ممه له گوندی لاجان-ی نزیك گوێر له سنوری پارێزگای هه‌ولێر شه‌ڕ له نێوان خه‌ڵكی ناڕازیی و هێزه ئه‌منیه‌كان ڕویدا ژمارەیەك قوربانی لێكەوتەوە، كە دواتر هێزێكی زۆری ئەمنی ڕەوانەی ناوچەكە كرا.
هەروەها دو ڕۆژ لەمەوبەریش دانیشتوانی گونده‌كانی ده‌وروبه‌ری گونده‌كانی هه‌ولێر خۆپیشاندانیان ده‌ستپێكرد و داوایانكرد ئه‌و پاڵاوگه نایاساییانه دابخرێن یاخود ئه‌و كه‌سانه‌ی له‌وێ كارده‌كه‌ن خه‌ڵكی گونده‌كان بن و دایانبمه‌زرێنن.
سەرچاوە: وێبسایتی ئاوێنە
https://www.awene.com/detail?article=130263
