باوکی گەنجە کوژراوەکەی لاجان نهێنیی شێوازی گیانلەدەستدانی کوڕەکەی ئاشکرادەکات.
لە لێدوانێکدا ئاماژەی بەوەکردووە، کوڕەکەی خەریکی کاری رۆژانەی خۆی بووە کە شۆفێری بارهەڵگر بووە، کەوتووەتە ناو خۆپیشاندانەکەی لاجانەوە، لەوێ رایانگرتووە و نەیانهێشتووە بڕوات.
وتیشی، لە ترسی رۆحی خۆی، ویستوویەتی لە ئۆتۆمبێلەکە بێتەدەرەوە و بچێتە گوندەکە و خۆی رزگاربکات، بەڵام نەگەیشتووە و بە دۆشکە لێیان داوە.
ئەوەشی ئاشکراکرد، ڤیدیۆم لایە، کەسێک فەرمان بە ئاسایشەکە دەکات و دەڵێت، “لێیدە.. لێیدە..”.
ئەو گەنجەی کوژراوە ناوی (عیرفان بەهادین ئەحمەد)ـە و تەمەنی 25 ساڵە. عیرفان دانیشتووی گەڕەکی دەروازەیە لە شاری کەرکووکە، خێزاندارە و باوکی کوڕێکە بەناوی (ئەیان)، کە هێشتا کۆرپەیە و تەمەنی دوو مانگە، نزیکەی سێ مانگ دەبێت بۆکاری شۆفێری تانکەری گواستنەوەی سوتەمەنی چووەتە هەولێر و لەوێ نیشتەجێ بووە.
ڕووداوەکە رۆژی شەممە(٣٠\١١\٢٠٢٥) ڕوویدا، کاتێک دانیشتووانی گوندی لاجان بۆ داواکردنی ئازادکردنی گەنجێک بەناوی (شکور) چوونە بەردەم پاڵاوگەی لاناز، بەڵام لەلایەن هێزە ئەمنییەکانەوە بە تەقە وەڵامدرانەوە و بەو هۆیەوە عیرفان گیانی لەدەستدا.
