هیوا عمر: 
ڕووداوی سوتاندنی دارستانەكانی ئەمازۆن و ئەمریكا و ئوسترالیا و لوبنان كوردستان هتد … سەڕەڕای جیاوازی هەڵكەوتەی جوگرافی و هۆكاری سوتاندنیان بەڵام ناتوانین بە دابڕاوی لە مەترسیەكانی سیستەم لەسەر مرۆڤ و ژینگەی گۆی زەوی بیانخوێنینەوە. ئەگەر ئەوێ رۆژێ لای ماركس مرۆڤ گەورەترین سەرمایە بوبێت بەڵام لە ئەمرۆدا مرۆڤ و ژینگە گەورەترین كاڵایە و هەمووشتێك لە پێناو قازانج پەرەستیدایە.
رووداوو گۆرانكارییەكان راستە پچڕپچڕ و لە شوێنی جیاوازدان بەڵام هەمووییان لە پەیوەیوەندییەكی تەواوكاری و دیالیكتیكی دان.
دوێنی قەیران و ئیفلاسی بانكەكان ئەمرۆش قەیرانی تەندورستی و ژینگە و كورتهێنانی بودجەی گشتی و نەمانی رۆڵی دەوڵەتە لە ژیانی جڤاكی، كە هەڵكشانی رێژەی بێكاری و هەژاری و دابەزینی داهاتی زۆرینەی تاك و نەمانی ئاسایشی ئابوری و كۆمەڵایەتیە لای زۆرینەی كۆمەڵگا لێ كەوتۆتەوە .
لەوەها دۆخێكدا و لە سایەی سەپاندنی پرنسیپی( كردنی هەمووشتێك بە كاڵا و قازانج پەرەستی ) لەمرۆدا دەبینین چۆن لە كوردستان و وڵاتانی سەرمایەداری لە بڕی ئەوەی دەوڵەت مافی بیمەی تەندروستی و چارەسەری پزیشكی بۆ توشبوانی ڤایرۆسی كۆرۆنا دابین بكات و بە ئەركی بەر پرسیارەتی كۆمەڵایەتی هەڵسێت كەچی وەك هەلێك دەقۆزرێتەوە و بازرگانی پێوە دەكا و دەكرێت لە رێگای كەرتی تایبەتییەوە !.
هەر لەمرۆدا دارستانەكان لەمسەری دوونیا بۆ ئەو سەری گڕی تێبەردەدرێت و دواتر مافیای سیاسی و بازرگانەكان بەناوی وەبەرهێنان و ئیستسمار داگیری دەكەن. دیاردەیەكی نامۆنییە لەمرۆی تاكپەرستی و نیولیبرالیزم ، هەرشتێك بۆنی موڵكی گشتی و سودی گشتی لێ بێت لەبەردەم مەترسی سوتان و داگیركردن دایە، بەڵام هەموو موڵك و ماڵی سەرمایەدارەكان سەیڤ و پارێزراوە ؟ .
سوتاندنی شاخی گۆیژە و دارستانەكانی تاسلوجە و كەسنەزان لە هەولێر بەشێكە لە دیاردەی بێ بایەخكردن و دەست بەسەرداگرتنی موڵكی گشتی كە دەمێكە لە رێگای ئاودیوكردن و داگیركردنی گرد و زەوی و موڵكی گشتییەوە دەستیان پێكردوە.
بابەتەكە لە قسەكردن و پرسیاركردن لە بارەی ئەركی دەستەی ژینگەو پۆلیسی دارستان وچارەنووسی داهاتی سندوقی ژینگە و ئەو پارەیەی لە هاوڵاتیان وەردەگیرێت بەناوی پاراستنی ژینگە چی بەسەر دێت، گەورەترە. هاوكات بڵاو كردنەوەی لێدوانی جیاوازی بەرپرسەكان وەك گوتەبێژی وەزارەتی كشتوكاڵ و سەرچاوەكانی ئاوی هەرێمی كوردستان كە رایدەگەیێنێت، “بەدواداچوونیان بۆ سووتانی سنەوبەرەكانی رێگەی تاسڵوجە – سلێمانی كردووە و بۆیان دەركەوتووە، پێشتر چەندین جار هەوڵدراوە ئەو ناوچەیە بكرێتە پرۆژە، بەڵام وەزارەتەكەیان رازی نەبووە.” لەو لاشەوە شارەوانی بە پێچەوانەوە قسە دەكات .
لە هەر رووداوێكی هاوشێوە چەندین لێدوانی دژ بەیەك و جیاواز دەبینن كە تەنیا بۆ لابردنی تەركیزە لە سەر شوناسی دەسەڵات و ئەجنداكەی . رۆچونە ناو وردەكاری دەبێت بۆ بینینی وێنە گەورەكە بێت نەك ونكردنی، لە كاتێكا ئەمان ماشێنێكی گەورەی راگەیاندنیان بۆ لێڵكردنی بینایمان لە بینینی وێنەگەورەكە لە كاردایە. گۆرین و پاراستنی ژیان و ژینگەكەمان ، ئەركێكە لە ئەستۆی زۆرینەكەدایە، سوتاندنی هەزاران دار لە گۆیژە و سنوبەرەكانی تاسلوجە و دارستانەكانی كەسنەزان لە هەولێر كە دەیان هەزار ساڵە رۆچونەتە زەوی ناتوانێت سوڕی داری سەوزی ژیان و بۆنی سنەوبەرەكانی ئێرەو ئەوێ بوەستێنێت .
تێبینی: ئەم وتارە لە دواین ژمارەی رێگای كوردستان بڵاو بۆتەوە
