لەبەردەم پەرلەمانی هۆڵەندا یادی سەردەشت عوسمان بەرز ڕاگیرا
سەردشت عوسمان ئەو ڕۆژنامەنووسەی بە ئەدەبییانە ڕخنەی ئاڕاستەی لایەنی پەیوەندیدار دەکرد، لێ حزبی دەسەڵاتداری دواکەوتوو بەفیشەک وەڵامی دایەوە،
زۆر ڕامام و بیرم کردەوە،بەدوای وشەیەک یاخود ڕستەیەک کەشایستەی تۆ بێت سەردشتی باڵای ئازادی نەبوو تەنها خودی خۆت پێناسەی بۆ هەموو بڵندیەکت ،زۆر گەڕام بەنێو خەیاڵدانمدا بەدوای ئەو هزرو ئازایەتییەی ئێوە(سەردشت و کاوەو سۆران)تا بمگەیەنێت بەتامی ئازادیی! لێ نەگەڕام تا لە ئێوە فێربووم بۆ خۆم نەژیم و موڵکی زۆڵملێکراوان و نەداران بم، لێ نەگەڕاوم و وەکو تۆو سۆران،قەڵەمەکەتانم هەڵگرتو سوێندم خواردە تا دواهەناسە لەگەروومدابێت وەلێ ناوەستم وکۆڵنادەم لەسەر وتنی حەقیقەت و ئازادیی و دادپەروەری، سەردەشت وسۆران میراتگری حەقیقەتی ڕاستگۆیانەی ئێوە هەرئێمەی خانەوادە نین بەڵکو سەدان ئازادیخوازو هاوبیر هەن بوونەتە هەڵگری دۆسیەکەتان وخامە خوێناویەکەتان و ناهێڵن بکوژان بەئاسوودەیی سەرخەوێکیش بشکێنن، بۆ سەلمێنەری ئەم ڕاستیەش ئەوەتا بەردەوام یادو ناوتان بەرز ڕادەگیرێت و ڕۆژی تیرۆرکردنتان وەک خۆتان بە بەرزی ماوەتەوە،هەزاران پەیڤ و ڕستەو وتارو هۆنراوە بۆ ئێوەی باڵا یادتان بڵند ڕادەگرن،ئەمە قوربانی دانی ئێوەیە ئەگینا زۆر هەبوون چوون و کەسیش بە بای خەیاڵیا نەهات، بەڵام ئێوە ڕووناکیتان بە ڕێگای ڕێبازێک دا هەرگیز خامۆش نابێت.ئێوە سەرتۆپی ئازادین و بانگەوازن بۆ دادپەروەری، پەیمان بێت ئێمە بەرەهەمەکەتان بچنینەوە، ژیانی ئێوە بووە بەردەبازی ئازادی سبەی هەمووان….، ژینتان ئامانج و ڕێگای داهاتووی کۆمەڵگایە.
گەردەمامەحەمە
4/5/2024
